ازاي طفل الحضانة يحب الصلاة
مقال لرفيدة خالد
ازاى نعلم الحلو الصغنن الصلاة👶🏻👧🏼
الحلو الصغنن بيبدا يصلى وهو تقريبا عنده سنه كل اما يشوف ماما وبابا وجدو بيصلوا يجرى قدامهم ويتفرج عليهم فترة ويبدأ يقلد حركه واحده من الصلاة ( ركوع . سجود . وقوف ) انت وحظك😄
وتبدا الصلاة تكبر تكبر تكبر تكبر وهو يكبر يكبر يكبر معاها😂
وكل اما الصغنن يكبر وتبدأ حركات الصلاة تكتر معاه يعنى على سن السنتين يبدأ( يقف ويركع أو يركع ويسجد ) حسب مزاجه والحركتين اللى هيركبوا مع بعض
هنا بقى لازم نعمل زفه وفرح 🥰🥳🥳🥳ونهلل بقى عشان هو وقف صلى ( ونعم الصلاة الصراحه 😄 )
ونبدأ معاه خطوة خطوة واحنا بنجهز للصلاة ننادى عليهم يلا نصلى ونبقى فرحانين عشان هيصلوا معانا وبعد الصلاة يبقى احلى حضن بياخدوه فاليوم بعد فترة هيحسوا أن حضن الصلاة احلى حضن حتى لو مصلوش هيجروا بعد الصلاة عليكم عشان الحضن
عندنا بقى لحد ٤ سنين نحضن ونبوس ونعمل افراح وحركات عشان وقف معانا فالصلاة الفترة دى هيكون اتعلم سورة الفاتحه نبدأ واحده واحده بدون توجيه مباشر أننا نرفع صوتنا فقراءة الفاتحه فالصلاة فترة وهيلاحظ أننا بنقرا حاجه هو عارفها هيبدا يقرأ من نفسه الفاتحه ( وهتبقى عنده الصلاة كلها أنه يقرا الفاتحه وشكرا😄 ولازم نقوله العفو كتر خيرك )
لحد ٥ سنين هيكون مدرك ومتعلم تماما حركات الصلاة كامله وقراءة الفاتحه والتسبيح فالصلاة
ونركز أننا نعلمهم واحده واحده اسماء الصلوات الخمس وعدد ركعاتها
مثال لو عند سن ٣ سنوات بعد كل صلاة مع الحضن ها مننساش الحضن 😁 مع كل حضن نقول اسم الصلاة وعدد الركعات( ظهر ٤ / مغرب ٣) هو هيحفظهم كده ويبقى يفهم بعدين 😂😂😂
دومتم مقيمين للصلاة يا صغنن يا جميل💝